L j ó ð

Garibaldi hefur gefið út níu ljóðabækur og fékk sérstaka viðurkenningu Bókmmenntaverðlauna Tómasar Guðmundssonar árið 2000 fyrir handritið að bókinni sjónbaugar og styrk úr Höfundasjóði RSÍ til að vinna helgust árið 2019. Garibaldi hefur einnig gefið út bókina Blóð á striga með þýðingum ljóða úr ensku árið 2008 og þýðingar eigin ljóða í A Maze of Gazes 2017.

Vegferð í myrkri (1983) er fyrsta ljóðabók mín og kom út 1983. Hún ber skýr merki þess að vera fyrsta bók, myndmál og umfjöllunarefni óþroskuð. Fjallar einkum um myrka æsku skáldsins.  Meira...

 

 

 

 

 

Í sjónhimnum (1997) fjallar Garibaldi m.a. um veru sína í Kanada og stöðu útlendings í framandi menningu, en hann dvaldist þar í landi við nám um fimm ára skeið. Að þessu leyti minna ljóðin á skrif Vestur-Íslendinga á 19. og 20. öld. Í ljóðum sínum vinnur Garibaldi nokkuð með vísanir í fyrri bókmenntir, bæði innlendar og erlendar, til að skapa slíka spennu. Ljóðin voru kölluð vegaljóð og vöktu nokkra athygli.  Meira...

 

Í sjónbaugum (2000) ber meira á hugleiðingum um myndir sem fyrirbæri en einnig er þar í auknum mæli leikið með tungumálið og hljóm þess. Fjallað er um átakamikla reynslu af að missa ástvin fyrir borð í sjóinn en einnig dregnar upp myndir af fögru landslagi og glímt við tímann. Handritið hlaut sérstaka viðurkenningu Bókmenntaverðlauna Tómasar Guðmundssonar.

     Ljóðin skiptast í 5 kafla og fjalla m.a. um landslag í Kanada og á Íslandi, um tímann og dauðann, um samband manns við aðrar manneskjur, kynhneigð og firringu.  Meira...

 

Í mátti borgin ekki vera rúðustrikað blað (2003) ákallar Garibaldi myndlistarkonuna Rósku en í ljóðunum er tekið á samfélagsmeinum eins og græðgi, hernaðarbrölti og ofbeldi en einnig ástinni og tengslum barns og foreldra. Þrjár kynslóðir í borginni varpa ljósi á sögu hennar og þróun úr litlum bæ í borg með einsleitum úthverfum.

     Ljóðin vefa saman minningar skáldsins og efni úr reynslu listakonunnar Rósku sem er ávörpuð í næstum hverju ljóði. Byggir það efni á bókinni Róska sem kom út árið 2000 og Hjálmar Sveinsson ritstýrði en Nýlistasafnið gaf út.  Meira ...

 

Í höfðaborg (2005) dregur Garibaldi m.a. fram myndir af fjölskyldu sinni, börnum, föður, ásamt afa og ömmu sem bjuggu í Höfðaborg í Reykjavík sem laun fyrir forstöðu Verkamannaskýlisins við Tryggvagötu í aldarfjórðung. Einnig eru nokkur ljóð um konur, m.a. um Júlíönu Jónsdóttur í einsemd sinna erfiðu daga í Kanada og Bandaríkjunum, um hríð ekki fjarri þeim slóðum sem Garibaldi dvaldi á við nám. Veröldin er flestum persónum ljóðanna framandi, jafnvel á heimaslóðum.

Hér fjallar skáldið um fjölskyldumeðlimi sína, föður, afa, börn og bróður, auk almennari ljóða.

Bókin geymir einnig þýðingu á ljóðabálkinum Draugaveiki eftir bandaríska skáldið Luis Alberto Urrea. Bálkurinn kom fyrst út 1996.

Helgi Örn Helgason lagði til kápumynd og myndir í bókinni.  Meira...

órans vængir (2006) er ljóðrænt myndasafn af hugsunum og sýnum sem gætu jafnvel kallast órar, ímyndanir án tengsla við hefðbundinn veruleika. Jafnframt er vikið að einangrun þeirra sem taldir eru veikir á geði, en einnig harkalegri meðferð samfélagsins á listafólki sem ekki fellur að viðurkenndum hugmyndum.  

Þessi sjötta ljóðabók Garibalda sýnir sem fleiri bækur hans mikið vald á tungunni og skáldskaparmálinu. Hér eru ljóð um dárabáta, órans vængi, listina, þrána og ástina, og minnst á ýmsa samtímaatburði.

Mynd á kápu er eftir Garibalda. Meira...

 

drengmóður (2007) er enn frekari umfjöllun um bernsku skáldsins og kallar upp gamlar slóðir þar sem borg og sveit mætast í bæjarlandinu ekki síst í kringum Elliðaár og hraunið milli Reykjavíkur og Hafnarfjarðar. 

Ljóðin rifja upp bernskutíð skáldsins og draga fram myndir af Reykjavík, ekki síst mótum borgar og sveitar, yss og kyrrðar, en einnig hættur vatnsfalla og hrauns. Guðstrú fær hér meira rúm en í fyrri bókum. Vísað er í margvíslega atburði í heiminum, t.d. geimkapphlaup og lendingu á tunglinu, morð frægs fólks og fleira.

Garibaldi tók myndir á kápu og hannaði bókina alla.  Meira...

 

Blóð á striga (2008) inniheldur eingöngu þýðingar ljóða úr ensku eftir ýmis skáld allt frá William Wordsworth til Allens Ginsberg og Natöshu Le Bel. 

Í bókinni er reynt að sýna hvernig fyrirbæri eins og tækni, borgir og skipulag taka á sig blæ hins náttúrulega og hvernig þessi fyrirbæri renna saman við náttúruna, jafnvel eins og í einu ljóðanna þegar troða skal ávölum kvenlíkama í ferhyrndan kassa. Höfundarnir í bókinni eru bæði lífs og liðnir, heimsfrægir og minna þekktir.

Mynd á kápu er eftir Baldvin Baldvinsson. Meira...

 

A Maze of Gazes. Selected Poems 1997-2007 (2017) er safn sjálfsþýðinga á ensku á ljóðum Garibalda frá og með sjónhimnur (1997) til og með drengmóður (2007).

Safnið sýnir helstu einkenni á ljóðum Garibalda eins og sýn á náttúru, borgina, fjölskylduna, hlutverk föður og sonar og á ljóðlistina sem slíka. Vald hans á tungumálinu og myndmáli kemur hér fram á annarri tungu, þ.e. ensku.

Mynd framan á kápu Helgi Örn Helgason, „Vatnslitir nr. 11“ í Moleskine Serie VIII.

Mynd aftan á kápu Baldvin Baldvinsson. Meira...

smávinir fagrir foldarskart (2019) fjallar um Kína, alþýðu þess, menningu og sögu en Garibaldi heimsótti borgina Gvangsjó þar í landi árið 2007. Í bókinni er nokkrum undrastöðum lýst og gefin mynd af einni fjölskyldu í þremur kynslóðum ásamt umfjöllun um Maó Zedong og arfleifð hans.

Titill bókarinnar er fenginn úr Hulduljóðum Jónasar Hallgrímssonar sem lætur Eggert Ólafsson mæla þau orð en hann er þar í hlutverki landsföðurins mikla eins og Maó í kínverskri menningu. Ljóðin eru afar gagnrýnin á ástand mála í þessu stóra ríki sem byggir á kapítalisma og kommúnisma í senn, hefur skapað alþýðunni rúm kjör á efnahagssviðinu en einkar kröpp hvað málfrelsi og mannréttindi varðar. Ljóðin sýna einnig hvað kínversk alþýða og íslensk eiga margt sameiginlegt.

Garibaldi hannaði kápuna með myndinni „Dauði Eggerts Ólafssonar“ eftir I. Haas frá 1769.

Panta eintak...

helgustur (2020) fjallar um ævi manns sem lendir á glapstigum sem barn og er sendur í sveit á nokkra bæi þar sem margvíslegt ofbeldi er allsráðandi. Kynferðisofbeldið brenglar hugmyndir hans um tengsl kynjanna og lífið almennt eru allbrenglaðar.
Þegar hann kemur aftur til borgarinnar reynir hann t.d. að nauðga móður sinni. Hann ræður sig á sjóinn og hjálpar bróður sínum um pláss á bátnum. Fer þó svo að maðurinn fellur útbyrðis og deyr fyrir framan augun á bróður sínum. Eru lýsingar á þessum afdrifaríku atburðum óvægnar og á stundum mikilfenglegar.

Bókin er áfellisdómur yfir vistheimilakerfinu þar sem börn voru látin dvelja sem allra lengst frá ástvinum og fjölskyldum árum saman án nokkurra flóttaleiða.

Útgefandi er LEÓ Bókaútgáfa. Verð kr. 3.490. Panta eintak...

Um myndir og hönnun bókanna

Helgi Örn Helgason léði myndir í ljóðabækurnar Vegferð í myrkri og höfðaborg.
Auk þess á hann kápumyndir á fleiri bókum Garibalda.

Helgi útskrifaðist úr Myndlistar- og handíðaskólanum í Reykjavík 1986 og hefur síðan stundað myndlist, bæði málverk og teikningar. Hann hefur lengstum búið í Svíþjóð, fyrst í Järna skammt suður af Stokkhólmi en býr nú í Lundi í Svíþjóð. Helgi heldur úti vef um myndlist sína sem er aðgengilegur hér.

Í myndunum í Vegferð í myrkri  beitti Helgi Örn þeirri aðferð að styðjast við myndbyggingu í japönsku letri, og teiknaði slíkar myndir á hverja síðu í mörgum símaskrám. Sýna flestar myndir bókarinnar því einnig fjölda nafna og símanúmera.

Helgi hefur haldið nokkrar sýningar í Reykjavík og Stokkhólmi. Hann hefur einnig leikið á saxófón og spilað á mörgum stöðum í Svíþjóð og víðar í Evrópu.

Garibaldi og Helgi kynntust á sjálfsstyrkingarnámskeiðum árið 1983 og hafa verið vinir síðan.

Halldóra Guðmundsdóttir, móðir Garibalda, gerði myndina „Öskuró“ framan á sjónbaugum en Hrafn Karlsson, mágur Garibalda, tók ljósmyndina á baksíðu bókarinnar.

 

Halldóra byrjaði að mála eftir að heilsu hennar fór að hraka verulega á efri árum, tók þátt í nokkrum námskeiðum fyrir eldri borgara en hélt aldrei sýningu á verkum sínum.

Baldvin Baldvinsson, bróðir Garibalda, hefur léð nokkrar myndir, m.a. kápumyndir á Blóð á striga og Íslandslag.

Garibaldi hefur sjálfur hannað allar kápur og útlit ljóðabóka sinna, þar á meðal smávinir fagrir foldarskart, og unnið aðrar myndir á þeim, t.d. teiknaði hann og skrifaði framan á kápu Vegferðar í myrkri, vann mynd framan á mátti borgin ekki vera rúðustrikað blað og aftan á Íslandslagi, og tók ljósmyndir framan á bókunum órans vængir og drengmóður. 

Garibaldi, Baldvin og Halldóra eru ekki skólagengin í myndagerð.

 
Garibaldi  ehf
tölvupóstur garibaldi@garibaldi.is
© Garibaldi
iceland-flag-xl.jpg